ყველაზე, ყველაზე რთული სარეკლამო და საკონკურსო  პოსტების დაწერაა, იმიტომ რომ რაღაც დოზით მაინც შეზღუდული და დაძაბული ხარ. სარეკლამოს შემთხვევაში დამკვეთი არსებობს, მეორე შემთხვევაში კი კონკურსია – ვიღაცეებს ეჯიბრები.  ამიტომ ზოგადად, არ ვარ ხოლმე ბლოგერების  კონკურსების მომხრე, რადგან ბლოგერობა გარკვეულწილად თავისუფლებაა, გინდა ჩაისუნთქებ და ამოისუნთქებ, გინდა ორჯერ ისე ჩაისუნთქებ რომ ერთხელაც არ ამოისუნთქებ.

მაგრამ მიუხედავად ამისა, მაინც გადავწყვიტე რომ დამეწერა საკონკურსო პოსტი პერიტუს გრუფის ბლოგერთა კონკურსისათვის, რომლის მიზანია პიარის სფეროს პოპულარიზაცია და პიარის სფეროთი დაინტერესებული ბლოგერების სტიმულირება.

and here we go:

  საზოგადოებასთან ურთიერთობა არის ძალიან საინტერესო, ძალიან მოდური, ძალიან აქტუალური და ამავდროულად საკმაოდ სტრესული (თუ სტატისტიკას დავეყრდნობით – ერთ ერთი ყველაზე სტრესული) სფერო.

სფერო, რომელიც ყოველდღიურად მოითხოვს ფორმაში ყოფნას!!! რა თქმა უნდა აქ კონკრეტული ადამიანის ვიზუალი არ იგულისხმება 🙂

მე პირადად, უკვე რამდენი წელია ამ სფეროში ვმუშაობ და შესაძლოა სათქმელიც ბევრი მქონდეს, მაგრამ მოდით ერთი საკმაოდ პრობლემური მიმართულებით წავალ და აქვე გამოვთქვამ სინანულს, რომ არ გამაჩნია კონკრეტული სქრინშოტები, რომლითაც თქვენც გაგახალისებდით და უფრო მეტად მხატვრული და საინტერესო გამოვიდოდა პოსტიც.

 

   PR  ვაკანსია – არის თემა რომელზეც მინდა დავწერო.

  სამწუხაროდ დღევანდელი დამსაქმებლების უდიდესმა ნაწილმა არ იცის რა არის პიარი და ხშირად წარმოუდგენელ პუნქტებს ნახავთ ხოლმე გამოცხადებულ ვაკანსიებში, უფრო ხშირად კი პიარი “ყველაფერშიკობასთან” არის გაიგივებული.

მოდით ძალიან მარტივად ჩამოვაყალიბებ რამდენიმე პუნქტად და ჩემი კოლეგები მერე იმედია კომენტარებში დამეხმარებიან განვავრცოთ ეს თემა:

1. პიარ მენეჯერი არ არის ოფის მენეჯერი – ეს არის ხოლმე ყველაზე ხშირად არეული ვაკანსიებში, რამდენჯერ გაგვიხილავს ფეისბუქზე დახურულ ჯგუფებში მსგავსი ვაკანსიები. რეალურად როდესაც დამკვეთს სჭირდება ოფის მენეჯერი, იხდის ხელფასს 300–350 ლარს და ვაკანსიას აცხადებს პიარ მენეჯერისას.

2. პიარ მენეჯერი არ არის მარკეტინგის მენეჯერი – მართალია ეს ერთ სიბრტყეზე მომუშავე სფეროა და ხშირია შემთხვევები როდესაც კომპანიებში პიარისა და მარკეტინგის მენეჯერის ფუნქციებს ერთი ადამიანი ითავსებს, მაგრამ როდესაც ვაკანსიას აცხადებ პიარ მენეჯერზე, უნდა იცოდე რომ ეს არის საზოგადოებასთან ურთიერთობის თემა და არა ფლაერების დარიგება და რეკლამების განთავსება.

3. კარგი პიარ მენეჯერი მერხიდან ვერ დადგები – სამწუხაროა მაგრამ ასეა, საზოგადოებასთან ურთიერთობას მარტო წიგნიდან ვერ სწავლობ, ეს არის ყოველდღიური პროცესი. პროცესი დაუღალავი მუშაობისა და დაუღალავად დაკვირვებისა. განსაკუთრებით დღეს “ციფრულ ერაში” როდესაც ცხოვრებამ საოცარი აქსელერაცია განიცადა და ჩვენც თითქოს ტურბინიან ძრავზე ვიყოთო ისე  მივყვებით მას, შეუძლებელია რომ მხოლოდ წიგნებიდან ნასწავლი ადამიანი იყოს კარგი პიარ მენეჯერი. კარგი პიარ მენეჯერი – მხოლოდ გარკვეული გამოცდილების მიღების შემდეგ ხდები.

4. ანაზღაურება – ეს პუნქტი გარკვეულწილად წინა პუნქტის გაგრძელებაა. კომპანიები ეძებენ კარგ პიარ მენეჯერებს 1000 ლარად, 1200 ლარად და ერთგან ვნახე სასურველია მანქანაც ყავდესო.  :)))))  ჩემი კეთილი რჩევა იქნებოდა:  “გონს მოეგეთ”, კარგი პიარ მენეჯერის ხელფასი 2000 – 2500 ლარი არის მინიმუმ და თუ თქვენ მხოლოდ განათლებით პიარ მენეჯერებს ეძებთ ნუ დაწერთ რომ “კარგი და გამოცდილი” პიარ მენეჯერი გინდათ.

5. ვაკანსიის ტექსტი: ვიდრე ვაკანსიას გამოაცხადებდეთ და ონლაინ ან ოფლაინ გამოაქვეყნებდეთ სადმე, იქნებ ვინმე კომპეტენტურსაც გადაახედოთ ხოლმე.

მაგალითისთვის 🙂

 

 

6.  და ბოლო, მართალია საზოგადოებასთან ურთიერთობის მენეჯერს ხელს უწყობს ჟურნალისტური განათლება და წერის უნარი ხომ საერთოდ,  მაგრამ არ უნდა დაგვავიწყდეს, რომ პიარი ჟურნალისტიკა არ არის !!!

 

  არ ვიცი რა ბედი ელის ამ პოსტს კონკურსზე,

მაგრამ ვინც წაიკითხავს თუ გაითვალისწინებს და სხვებსაც მოუყვება ისევ ჩვენთვის და ჩვენი დარგის განვითარებისთვის იქნება უკეთესი.

 საუკეთესო სურვილებით 2014 წლისათვის…

Comments

comments